କ୍ରୀଡା କ୍ଷେତ୍ରରେ ବି କମ୍ ନୁହଁନ୍ତି ଦିବ୍ୟାଙ୍ଗ ନାରୀ

ଟାହିଟାପରାକୁ ପଛରେ ଫିଙ୍ଗି ଆଗକୁ ବଢ଼ିବାର ସ୍ୱପ୍ନ ଦେଖିଥିଲେ । ସଂଘର୍ଷ ସହିତ ନିୟମିତ ଅଭ୍ୟାସ ବଳରେ ସଫଳତାର ସ୍ୱାଦ ଚାଖିଥିଲେ । ଜନ୍ମରୁ ଗୋଟିଏ ହାତ ନ ଥାଇ ମଧ୍ୟ ନିଜର ନିରନ୍ତର ପ୍ରୟାସ ବଳରେ ସେ ରାଜ୍ୟସ୍ତରୀୟ ପାରା ଦୌଡ଼କୁଦ କ୍ରୀଡ଼ାରେ ସ୍ୱର୍ଣ୍ଣ ପଦକ ସହ ଏକାଧିକ ପଦକ ହାସଲ କରିଛନ୍ତି । ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକ୍ ପଟିଲୋ ପଞ୍ଚାୟତ ନନ୍ଦନ ଗାଁର ୨୯ ବର୍ଷ ବୟସ୍କା ସୁଭଦ୍ରା ଦାସଙ୍କର ଇଏ ହେଉଛି ସଂଘର୍ଷରୁ ସଫଳତାର କାହାଣୀ । ସନାତନ ଦାସ ଓ ଶାନ୍ତିଲତା ଦାସଙ୍କର ଦୁଇ ଝିଅ ଓ ଗୋଟିଏ ପୁଅଙ୍କ ମଧ୍ୟରେ ସୁଭଦ୍ରା ହେଉଛନ୍ତି ବଡ଼ । ଜନ୍ମରୁ ତାଙ୍କର ଗୋଟିଏ ହାତ (ବାମ) ନ ଥିଲା । ସେଥିପାଇଁ ପରିବାର ଲୋକ ନାଁ ରଖିଥିଲେ ସୁଭଦ୍ରା । ତେବେ ପାଠ ପଢ଼ିବାକୁ ଯିବା ସମୟରେ ହେଉ କିମ୍ୱା ଖେଳ ପଡ଼ିଆରେ, ସବୁବେଳେ ତାଙ୍କୁ ଟାହିଟାପରା ଶୁଣିବାକୁ ପଡୁଥିଲା କିନ୍ତୁ ସେଇ ଟାହିଟାପରା ହିଁ ସୁଭଦ୍ରାଙ୍କୁ ଆଗକୁ ବଢ଼ିବାର ପ୍ରେରଣା ଦେଲା । ସ୍ନାତକ ଶେଷ ହେବା ପରେ ସେ ଭୁବନେଶ୍ୱର ଚାଲିଗଲେ । ଗଣ୍ଡମୁଣ୍ଡାଠାରେ ଭିନ୍ନକ୍ଷମ ପ୍ରଶିକ୍ଷଣ କେନ୍ଦ୍ରରେ କମ୍ପୁ୍ୟଟର ତାଲିମ ନେଲେ । ପରିବାର କିମ୍ୱା ସମାଜ ଉପରେ ବୋଝ ହେବାକୁ ନ ଚାହିଁ ଭୁବନେଶ୍ୱର ପୋଖରୀପୁଟରେ ଏକ ଛୋଟ ଦୋକାନ କରି ସ୍ୱାବଲମ୍ୱୀ ହେଲେ । ବିଭିନ୍ନ ଦିବ୍ୟାଙ୍ଗ ପିଲାମାନଙ୍କ ପାଇଁ ଅନୁଷ୍ଠିତ ପ୍ରତିଯୋଗିତାକୁ ଯିବା ସମୟରେ ଧୀରେ ଧୀରେ ଖେଳ ପ୍ରତି ଆକୃଷ୍ଟ ହେବା ସହିତ ଏଥିପାଇଁ ତାଲିମ ବି ନେଲେ । ୨୦୨୩ ରାଜ୍ୟସ୍ତରୀୟ ପାରା ଦୌଡ଼କୁଦ ପ୍ରତିଯୋଗିତାରେ ସେ ପ୍ରଥମ ସଫଳତା ସାଉଁଟି ଜାଭଲିନ୍ ଥ୍ରୋ’ରେ ସ୍ୱର୍ଣ୍ଣ ଓ ଡିସ୍କସ୍ ଥ୍ରୋ’ରେ ରୌପ୍ୟ ପଦକ ହାସଲ କରିଥିଲେ । ୨୦୨୪ରେ ଜାଭଲିନ୍ ଥ୍ରୋ’ରେ ଗୋଟିଏ ସ୍ୱର୍ଣ୍ଣ ଓ ସଟ୍ ପୁଟ୍ ରେ ଗୋଟିଏ ରୌପ୍ୟ ପଦକ ହାସଲ କରିଛନ୍ତି ସୁଭଦ୍ରା । ଆଗକୁ ଜାତୀୟ ଓ ଅଲିମ୍ପିକ୍ସ କ୍ରୀଡ଼ାରେ ଭାଗ ନେବାକୁ ଲକ୍ଷ୍ୟ ରଖିଛନ୍ତି । ଏଯାଏଁ କୌଣସି ସରକାରୀ ସହାୟତା ପାଇ ନ ଥିବା ସୁଭଦ୍ରାଙ୍କୁ ହୁଏତ ପ୍ରୋତ୍ସାହନ ମିଳିଲେ, ରାଜ୍ୟ ଓ ଦେଶ ପାଇଁ ଗୌରବ ଆଣିବାରେ ସଫଳ ହେବେ ।