ବ୍ୟବସ୍ଥାଗତ ସଂଶୋଧନ ଦ୍ୱାରା ଭିନ୍ନକ୍ଷମଙ୍କୁ ମୁଖ୍ୟ ସ୍ରୋତରେ ସାମିଲ କରିବା ପାଇଁ ସାଂସଦ ଶଶି ଥରୁରଙ୍କ ଆହ୍ୱାନ

୨୦୨୫ ଜନଗଣନାରେ ଭିନ୍ନକ୍ଷମଙ୍କ ପାଇଁ ଏକ ଅଲଗା ବିଭାଗ ରହିବା ଦରକାର । ସଠିକ ତଥ୍ୟ ଅଭାବରୁ ସମ୍ୱଳ ଆବଣ୍ଟନ ଏବଂ ପ୍ରଭାବଶାଳୀ ନୀତିର ପ୍ରଣୟନ ନିମନ୍ତେ ଏକ ବଡ଼ ପ୍ରତିବନ୍ଧକ ପାଲଟିଛି ବୋଲି ଇମ୍ରାନ୍ କହିଛନ୍ତି । ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଏକ ଅଧିକ ମାନବିକ ଓ ସମାନ ସମାଜ ଗଠନ ପାଇଁ ଆହ୍ୱାନ ଦେଇଥିଲେ । ଭିନ୍ନକ୍ଷମମାନେ ନିଜର ପ୍ରକୃତ ସାମର୍ଥ୍ୟକୁ ଉପଲବ୍ଧ କରି ସାମାଜିକ ଓ ଅର୍ଥନୈତିକ ମୁଖ୍ୟସ୍ରୋତରେ ସାମିଲ ହେବା ପାଇଁ ଆବଶ୍ୟକ ବୋଲି ସେ କହିଛନ୍ତି । ମହାରାଷ୍ଟ୍ରର ପୂର୍ବତନ ବିଧାୟକ ତଥା ପ୍ରହର ଜନଶକ୍ତି ପାର୍ଟିର ପ୍ରତିଷ୍ଠାତା ବଚ୍ଚୁ କାଡୁ ବଜେଟ୍ ଆବଣ୍ଟନକୁ ସୁବ୍ୟବସ୍ଥିତ କରିବା ଏବଂ ଏହାର ସଠିକ ବ୍ୟବହାର ସୁନିଶ୍ଚିତ କରିବାର ଆବଶ୍ୟକତା ଉପରେ ଆଲୋକପାତ କରିଥିଲେ । ମହାରାଷ୍ଟ୍ରର ଉଦାହରଣ ଦେଇ ସେ କହିଛନ୍ତି ଯେ ମୋଟ ୨୫,୦୦୦ କୋଟି ଟଙ୍କାର ବଜେଟ୍ ମଧ୍ୟରୁ ମାତ୍ର ୧,୪୦୦ କୋଟି ଟଙ୍କା ଭିନ୍ନକ୍ଷମଙ୍କ ପାଇଁ ଖର୍ଚ୍ଚ ହୋଇଛି । ଭିନ୍ନକ୍ଷମବ୍ୟକ୍ତିଙ୍କ ଅଧିକାର ଓ ସମ୍ମାନ ସୁନିଶ୍ଚିତ କରିବା ପାଇଁ କେବଳ ଲୋକୋପକାର ଠାରୁ ଅଧିକ ହସ୍ତକ୍ଷେପର ଆବଶ୍ୟକତା ରହିଛି । ଏଥିରେ ଦୃଢ଼ ନୀତିଗତ କାର୍ଯ୍ୟାନୁଷ୍ଠାନ, ଯଥେଷ୍ଟ ବଜେଟ୍ ଆବଣ୍ଟନ ଏବଂ କଠୋର କାର୍ଯ୍ୟକାରିତା ଦାବି କରାଯାଇଛି । ମହାରାଷ୍ଟ୍ର ଅନ୍ତର୍ଭୁକ୍ତୀକରଣ ଦିଗରେ ବଡ଼ ପଦକ୍ଷେପ ନେଇଥିବା ବେଳେ ଆହ୍ୱାନ ବ୍ୟାପକ ରହିଛି । ପର୍ଯ୍ୟାପ୍ତ ପାଣ୍ଠିଠାରୁ ଆରମ୍ଭ କରି ଅପହଞ୍ଚ ଶିକ୍ଷା ଓ ପ୍ରଯୁକ୍ତିବିଦ୍ୟା ପର୍ଯ୍ୟନ୍ତ, ଆମକୁ ପ୍ରତୀକାତ୍ମକ ପଦକ୍ଷେପଠାରୁ ଆଗକୁ ବଢ଼ିବାକୁ ହେବ ଏବଂ ବ୍ୟବସ୍ଥାଗତ ପରିବର୍ତ୍ତନ ପାଇଁ ପ୍ରତିଶ୍ରୁତିବଦ୍ଧ ହେବାକୁ ପଡ଼ିବ । ତା’ହେଲେ ହିଁ ଆମେ ସମସ୍ତଙ୍କ ପାଇଁ ଏକ ପ୍ରକୃତ ସମାବେଶୀ ଓ ସଶକ୍ତ ସମାଜ ଗଠନ କରିପାରିବା । ସରକାରଙ୍କ ଭୂମିକା ଉପରେ ଆଲୋକପାତ କରି ଉପମୁଖ୍ୟ ଭିନ୍ନକ୍ଷମ କମିଶନର ତଥା ମୁଖ୍ୟ ଭିଜିଲାନ୍ସ ଅଧିକାରୀ ପ୍ରବୀଣ ପ୍ରକାଶ ଅମ୍ୱାସ୍ଥା ଭିନ୍ନକ୍ଷମଙ୍କ ପାଇଁ ବିଭିନ୍ନ ପଦକ୍ଷେପ ସମ୍ପର୍କରେ ଆଲୋକପାତ କରିବା ସହ ସମସ୍ତ ଅଂଶୀଦାରଙ୍କୁ ଏକଜୁଟ ହୋଇ କାର୍ଯ୍ୟ କରିବାର ଆବଶ୍ୟକତା ରହିଛି ବୋଲି କହିଥିଲେ । ସମାବେଶରେ ଭିନ୍ନକ୍ଷମ ଓକିଲ ଗୋଷ୍ଠୀର ସଦସ୍ୟମାନେ ସାଂସଦମାନଙ୍କୁ କେବଳ ପ୍ରତିନିଧିତ୍ୱ ଠାରୁ ଆଗକୁ ବଢ଼ିବା ଏବଂ ଭିନ୍ନକ୍ଷମ ଅନ୍ତର୍ଭୁକ୍ତୀକରଣ ପାଇଁ ଦୃଢ଼ ଆଇନଗତ ଏବଂ ନୀତିଗତ ଢାଞ୍ଚା ସୁନିଶ୍ଚିତ କରିବାକୁ ଅନୁରୋଧ କରିଥିଲେ । ସେମାନେ ଯୁକ୍ତି ବାଢ଼ିଥିଲେ ଯେ ଭିନ୍ନକ୍ଷମ ଅଧିକାର ଆଇନ, ୨୦୧୬ ଥିବା ସତ୍ତ୍ୱେ କାର୍ଯ୍ୟକାରୀ କରିବାରେ ବ୍ୟବସ୍ଥାଗତ ବ୍ୟବଧାନ ଏବଂ ବଜେଟ୍ ଅବହେଳା ଅସମାନତାକୁ ବ୍ୟାପକ କରୁଛି ଏବଂ ଏହି ପରିପ୍ରେକ୍ଷୀରେ ଭିନ୍ନକ୍ଷମ ଅଧିକାର ନୀତି ନିର୍ଦ୍ଧାରଣରେ ଏକ ବଳିଷ୍ଠ ଚିନ୍ତାଧାରା ହୋଇ ରହିପାରିବ ନାହିଁ । ଦୀର୍ଘ ଦିନ ଧରି ଭାରତର ନୀତି ଆଲୋଚନାରେ ଭିନ୍ନକ୍ଷମତା ଅଦୃଶ୍ୟ ହୋଇ ରହିଛି । ଆମକୁ ବହିଷ୍କାରର ଏହି ଚକ୍ରକୁ ଭାଙ୍ଗି ଏକ ଭବିଷ୍ୟତ ନିର୍ମାଣ କରିବାର ଆବଶ୍ୟକତା ଅଛି ଯେଉଁଠାରେ ଭିନ୍ନକ୍ଷମ ବ୍ୟକ୍ତିମାନଙ୍କୁ କେବଳ କଲ୍ୟାଣମୂଳକ ଦୃଷ୍ଟିକୋଣରୁ ଦେଖାଯିବ ନାହିଁ, ବରଂ ସକ୍ରିୟ ଯୋଗଦାନକାରୀ ଏବଂ ନିଷ୍ପତ୍ତି ଗ୍ରହଣକାରୀ ରୂପେ ଗ୍ରହଣ କରାଯିବ । ଭିନ୍ନକ୍ଷମବ୍ୟକ୍ତିଙ୍କ ପାଇଁ ରାଜନୈତିକ ଓ ଅର୍ଥନୈତିକ ଅନ୍ତର୍ଭୁକ୍ତୀକରଣ କେବଳ ଏକ ଆବଶ୍ୟକତା ନୁହେଁ, ଏହା ଏକ ସାମ୍ୱିଧାନିକ ଏବଂ ନୈତିକ ଆବଶ୍ୟକତା ବୋଲି ଏନ୍‌.ସି.ପି.ଇ.ଡି.ପି.ର କାର୍ଯ୍ୟନିର୍ବାହୀ ନିର୍ଦ୍ଦେଶକ ଅରମାନ ଅଲ୍ଲୀ କହିଛନ୍ତି ।