ସମସ୍ତ ସର୍ବସାଧାରଣ ପ୍ରତିଷ୍ଠାନରେ ଭିନ୍ନକ୍ଷମଙ୍କ ପାଇଁ ସୁଗମ୍ୟତା ସୁନିଶ୍ଚିତ କର – କେରଳ ହାଇକୋର୍ଟ

ନିକଟରେ ମାନ୍ୟବର କେରଳ ଉଚ୍ଚ ନ୍ୟାୟାଳୟ ଏକ ଉଲ୍ଲେଖନୀୟ ରାୟ ପ୍ରଦାନ କରି ରାଜ୍ୟ ସରକାର ସମସ୍ତ ସର୍ବସାଧାରଣ ପ୍ରତିଷ୍ଠାନଗୁଡିକୁ ନିଶ୍ଚିତ ରୂପେ ଭିନ୍ନକ୍ଷମମାନଙ୍କ ପାଇଁ ସୁଗମ୍ୟତା ସୁନିଶ୍ଚିତ କରନ୍ତୁ । ଅନ୍ୟଥା ଯଦି ସରକାର ଏହି ସୁବିଧା ଉପଲବ୍ଧ ନ କରନ୍ତି, ତେବେ କୌଣସି ସରକାରୀ କର୍ମଚାରୀଙ୍କୁ ସେମାନଙ୍କ ଶାରୀରିକ ଶକ୍ତିର ବିରୁଦ୍ଧ ପରିବେଶରେ କାର୍ଯ୍ୟ କରିବା ପାଇଁ ବାଧ୍ୟ କରିପାରିବେ ନାହିଁ । ରାଜ୍ୟ ସରକାରଙ୍କ ଦ୍ୱାରା କେରଳ ପ୍ରଶାସନିକ ଟ୍ରିବ୍ୟୁନାଲ୍ ଦ୍ୱାରା ପ୍ରଦତ୍ତ ଆଦେଶ ବିରୁଦ୍ଧରେ ଏକ ଆବେଦନର ବିଚାର କରି ଉକ୍ତ ରାୟ ପ୍ରଦାନ କରୁଛନ୍ତି । ଏଠାରେ ପ୍ରକାଶଯୋଗ୍ୟ ଯେ ୨୦୨୦ ମସିହାରେ ଟି. ରାଜୀବ ନାମକ ଜଣେ ବରିଷ୍ଠ ଗ୍ରେଡ୍‌ର ଟାଇପିଷ୍ଟ୍‌ଙ୍କର ଜଳସେଚନ ବିଭାଗରୁ ମୋଟରଯାନ ବିଭାଗରୁ ବଦଳି ହେବାକୁ ନେଇ ସେ ଟ୍ରିବ୍ୟୁନାଲ୍‌ରେ ଏକ ମାମଲା ଦାୟର କରିଥିଲେ । ତାଙ୍କର ପ୍ରାର୍ଥନା ଥିଲା କି ମୋଟରଯାନ ବିଭାଗଟି ଉପର ମହଲାରେ କାର୍ଯ୍ୟ କରୁଥିବାରୁ ଶାରୀରିକ ଭିନ୍ନକ୍ଷମତା ହେତୁ ସେ ସେଠାକୁ ଚଢ଼ି ଯିବାକୁ ଅସମର୍ଥ । ତେଣୁ ସେ ସରକାରଙ୍କୁ ପୂର୍ବ ଜଳସେଚନ ବିଭାଗରେ ନିଯୁକ୍ତି ପାଇଁ ପ୍ରାର୍ଥନା କରିଥିଲେ । ମାତ୍ର ସରକାର ତାଙ୍କର ଆବେଦନକୁ ବିଚାର ନ କରି ଆଗ୍ରହ୍ୟ କରିଦେବାରୁ ସେ ବାଧ୍ୟ ହୋଇ ମାନ୍ୟବର ଟ୍ରିବ୍ୟୁନାଲ୍‌ର ଆଶ୍ରୟ ନେଇଥିଲେ । ଟ୍ରିବ୍ୟୁନାଲ୍ ୨୦୨୦ ମସିହାରେ ଏହି ମାମଲାର ବିଚାର କରି ରାଜ୍ୟ ସରକାରଙ୍କୁ ଆର୍.ପି.ଡବ୍ଲୁ.ଡି ଆକ୍ଟ, ୨୦୧୬ ଅନୁଯାୟୀ ବିଚାରଭୁକ୍ତ ନିମନ୍ତେ ନିର୍ଦ୍ଧେଶ ପ୍ରଦାନ କରିଥିଲେ । ସରକାର ଯଦିଓ ଟି. ରାଜୀବ ବଦଳିକୁ ବିଚାର କରିଥିଲେ । ମାତ୍ର ତାଙ୍କ ଦରମାକୁ ବରିଷ୍ଠ ଗ୍ରେଡ୍‌ରୁ କନିଷ୍ଠ ଗ୍ରେଡ୍‌କୁ ହ୍ରାସ କରିଦେଇଥିଲେ । ଏହା ବିରୁଦ୍ଧରେ ପୁନଶ୍ଚ ରାଜୀବ ଟ୍ରିବ୍ୟୁନାଲ୍‌ର ଆଶ୍ରୟ ନେଇଥିଲେ । ଟ୍ରିବ୍ୟୁନାଲ୍ ମଧ୍ୟ ବରିଷ୍ଠ ଗ୍ରେଡ୍‌ର ଦରମା ସପକ୍ଷରେ ନିଜର ରାୟ ପ୍ରଦାନ କରିଥିଲେ ।