ବରଜର ବିଜୟ ଗାଥା

ପ୍ର – ନିଜ ଜୀବନରେ ଭିନ୍ନକ୍ଷମତା ଭିତରେ ବିଭିନ୍ନ ପ୍ରକାର ଆହ୍ୱାନର ସମ୍ମୁଖୀନ ହୋଇଛନ୍ତି, ତେବେ ସେଇ ଶାରୀରିକ ଆହ୍ୱାନ ହେଉ ବା ଆର୍ଥିକ ତଥା ପାରିବାରିକ ଆହ୍ୱାନ ପୁଣି ସାମାଜିକ କୁସଂସ୍କାର ଜନିତ ଆହ୍ୱାନକୁ କିପରି ସାମ୍ନା କରିଛନ୍ତି?
ଉ – ଆର୍ଥିକ ଆହ୍ୱାନ କଥା କହିଲେ ମୁଁ କହିବି ଯଦି ଗୋଟିଏ ଭିନ୍ନକ୍ଷମ ପିଲା ନିଜର ପରିଶ୍ରମ ବଳରେ ଉଚ୍ଚମାନର ନ ହେଲେ ବି ମଧ୍ୟମ ଧରଣର ମାର୍କ ରଖିଲେ ଆର୍ଥିକ ଆହ୍ୱାନ ଦୂର ହୋଇଯିବ । ସରକାରୀ ସ୍ତରରେ ବିଭିନ୍ନ ସ୍କଲାର୍‌ସିପ୍, ବିଭିନ୍ନ ଦାତବ୍ୟ ସଂସ୍ଥାରୁ ସାହାଯ୍ୟ ମିଳୁଅଛି । ସେଇ ସାହାଯ୍ୟକୁ ନେଇ ଜଣେ ମେଧାବୀ ଭିନ୍ନକ୍ଷମ ଛାତ୍ର ନିଜର ଆର୍ଥିକ ଅବସ୍ଥାକୁ ଦୂର କରି ପାରିବ । ତା’ପରେ ଶାରୀରିକ କଥା କହିଲେ, ପିଲାର ମାନସିକ ସ୍ଥିତି ଉପରେ ନିର୍ଭର କରୁଛି । ଯଦି ତା’ ପରିବେଶରେ ତାକୁ ଭିନ୍ନ ବୋଲି ପରିଚିତ କରନ୍ତି, ତେବେ ତା’ର ମନେହେବ ମୁଁ ଏଇ କାର୍ଯ୍ୟ କରି ପାରିବିନି । ସୁତରାଂ ମନୋବଳ ଶାରୀରିକ ଅକ୍ଷମତାକୁ କିଛି ମାତ୍ରାକୁ କମେଇ ଦେଇପାରେ ବୋଲି ମୁଁ ଭାବେ । ସେହିପରି ସାମାଜିକ କୁସଂସ୍କାର ଜନିତ ଆହ୍ୱାନ କଥା କହିଲେ, ଭିନ୍ନକ୍ଷମତାକୁ ନେଇ ନିଶ୍ଚିତ ଭାବରେ ତ କହିବେ । ଯେମିତି କି ପ୍ରଥମେ ପ୍ରଥମେ ଜନ୍ମ ହେଲେ, ତମେ ଜୀବନ ସାରା କିଛି କରି ପାରିବନି, ବୋଝ ହେଇକି ଘର ଉପରେ ରହିବ । ସେମିତି ଅନେକ କଥା ଆସେ ସମାଜରେ । ତେବେ ସେହି ସମୟରେ ମୁଖ୍ୟ ଭୂମିକାରେ ରୁହନ୍ତି ଘର ଲୋକ; ବାପା, ମା’, ଭାଇ, ଜେଜେବାପା, ଜେଜେମା’ । ବାହାରର କଟାକ୍ଷ ଯେପରି ତମ ପାଖରେ ନ ପହଞ୍ଚିପାରୁ, ସେ ସବୁଠୁଁ ଦୁରେଇ ରଖିଲେ ଗୋଟେ ଭିନ୍ନକ୍ଷମ ପିଲା ଆଗକୁ ଯାଇ ପାରିବ । ନିଜ କଥା କହିଲେ, ମୁଁ ମଧ୍ୟ ସେହିଭଳି କଥାର ସାମ୍ନା କରିଛି । ଗାଁ ପରିବେଶର ଲୋକ କୁହନ୍ତି, ତାକୁ ଭତ୍ତାଟା ମିଳିଯାଉ, କେମିତି କ’ଣ ସେ ଚଳିଯାଉ । ଆଉ ଗୋଟେ ଛୋଟମୋଟ ଦୋକାନ କରିଲେ ହେଇଯିବ । ହେଲେ ଏବେ ମୋର ସଫଳତାରେ ସମସ୍ତେ କୁହନ୍ତି, ତୋ ଯୋଗୁଁ ଆଜି ଆମ ଗାଁକୁ ସମସ୍ତେ ଜାଣିଲେ, ଏତେ ସରକାରୀ ବଡ଼ଲୋକ ଗାଁକୁ ଆସିଲେ ।