ସ୍ୱାସ୍ଥ୍ୟ ସଚିବ ଅଶ୍ୱତୀ ଏସ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ବୈଠକରେ ରାଜ୍ୟରେ ସିକିଲ୍ସେଲ୍ ଓ ଥାଲାସେମିଆ ବର୍ତ୍ତମାନ ସ୍ଥିତି, ପ୍ରାରମ୍ଭକ ସଂଧାନ, ପ୍ରତିରୋଧିମୂଳକ ବ୍ୟବସ୍ଥା ଚିକିତ୍ସା ସୁବିଧା ଓ ରୋଗୀ ସେବା ସମ୍ପର୍କରେ ସମୀକ୍ଷା କରାଯାଇଛି ।
ରାଜ୍ୟର ୨୧ଟି ଜିଲ୍ଲା ଜାତୀୟ ସିକିଲ୍ସେଲ୍ ରକ୍ତହୀନତା ନିରାକରଣ ମିଶନ୍ ଅଧୀନରେ ସାମିଲ ହୋଇଛି । ୨୦୨୩ ମସିହା ଜୁଲାଇରୁ ୨୦୨୫-୨୬ ଅବଧିରେ ରାଜ୍ୟରେ ୪୬.୬୫ ଲକ୍ଷ ପରୀକ୍ଷା ହୋଇଛି । ଏଥିରେ ୯୭ହଜାର ୫୦୧ ଆକ୍ରାନ୍ତ ଚିହ୍ନଟ ହୋଇଛନ୍ତି । ରାଜ୍ୟ ସରକାରଙ୍କ ସିକିଲ୍ସେଲ୍ ଓ ଥାଲାସେମିଆ ପରିଚାଳନା ବୈଠକରୁ ଏହି ସୂଚନା ମିଳିଛି ।
ସିକିଲସେଲ୍ ରକ୍ତହୀନତା ନିରାକରଣ ମିଶନ ଅଧୀନରେ ଅନୁଗୁଳ, ବଲାଙ୍ଗୀର, ବାଲେଶ୍ୱର, ବରଗଡ଼, ବୌଦ୍ଧ, ଦେବଗଡ଼, ଗଜପତି, ଗଞ୍ଜାମ, ଝାରସୁଗୁଡ଼ା, କଳାହାଣ୍ଡି, କନ୍ଧମାଳ, କେନ୍ଦୁଝର, କୋରାପୁଟ, ମାଲକାନଗିରି, ମୟୁରଭଞ୍ଜ, ନବରଙ୍ଗପୁର, ନୂଆପଡ଼ା, ରାୟଗଡ଼ା, ସମ୍ବଲପୁର, ସୁବର୍ଣ୍ଣପୁର ଓ ସୁନ୍ଦରଗଡ଼ ଜିଲ୍ଲା ରହିଛି । ବିଦ୍ୟାଳୟ ଓ ଅଙ୍ଗନବାଡି କେନ୍ଦ୍ରରେ ଜନ୍ମଠାରୁ ୧୮ ବର୍ଷ ପର୍ଯ୍ୟନ୍ତ ଶିଶୁମାନଙ୍କୁ ଆରବିଏସକେ ଟିମ୍ ଓ ଗର୍ଭବତୀ ମହିଳାଙ୍କୁ ଆଣ୍ଟିନେଟାଲ୍ କେୟାର ସମୟରେ ସ୍କ୍ରିନିଂ କରାଯାଉଛି । ଆଦିବାସୀ ଅଞ୍ଚଳରେ ଭ୍ରାମ୍ୟମାଣ ସ୍ୱାସ୍ଥ୍ୟ ୟୁନିଟ୍ ମାଧ୍ୟମରେ ପରୀକ୍ଷା ସୁବିଧା ଦିଆଯାଉଛି ।
ଆୟୁଷ୍ମାନ ଆରୋଗ୍ୟ ମନ୍ଦିର ଓ ସ୍ୱାସ୍ଥ୍ୟ କେନ୍ଦ୍ର ସ୍ତରରେ ପରୀକ୍ଷା ସୁବିଧା ରହିଛି । ସେହିପରି ପ୍ରତ୍ୟେକ ପଞ୍ଜୀକୃତ ସିକିଲସେଲ ରୋଗୀଙ୍କୁ ଯାତାୟତ ଖର୍ଚ୍ଚ ପାଇଁ ତାଙ୍କର ବ୍ୟାଙ୍କ୍ ଖାତାକୁ ପ୍ରତିମାସ ୫ଶହ ଟଙ୍କା ଓ ମାଗଣା ରକ୍ତ ଯୋଗାଇ ଦିଆଯାଉଛି । ବ୍ଲଡ ପ୍ୟାକ୍ ସର୍ଭିସ୍ ଚାର୍ଜରୁ ସେମାନଙ୍କୁ ମୁକ୍ତ କରାଯାଇଛି । ସରକାରୀ ଡାକ୍ତରଖାନାରେ ମାଗଣା ଔଷଧ ଦିଆଯାଉଛି । ୧୨ ବର୍ଷରୁ କମ୍ ବୟସର ଶିଶୁଙ୍କ ଅସ୍ଥିମଜ୍ଜା ପ୍ରତିରୋପଣ ପାଇଁ ସର୍ବୋଚ୍ଚ ୧୦ ଲକ୍ଷ ଟଙ୍କା ଅର୍ଥ ସାହାଯ୍ୟ ଦିଆଯାଉଛି । ସ୍ୱାସ୍ଥ୍ୟ ସଚିବ ଅଶ୍ୱତୀ ଏସ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ବୈଠକରେ ରାଜ୍ୟରେ ସିକିଲ୍ସେଲ୍ ଓ ଥାଲାସେମିଆ ବର୍ତ୍ତମାନ ସ୍ଥିତି, ପ୍ରାରମ୍ଭକ ସଂଧାନ, ପ୍ରତିରୋଧିମୂଳକ ବ୍ୟବସ୍ଥା ଚିକିତ୍ସା ସୁବିଧା ଓ ରୋଗୀ ସେବା ସମ୍ପର୍କରେ ସମୀକ୍ଷା କରାଯାଇଛି । ଏହା ସହ ସ୍କ୍ରିନିଂ, ଜେନେଟିକ୍ କାଉନସେଲିଂ ଓ ନିଦାନ ସୁବିଧା ବାବଦରେ ମଧ୍ୟ ଉକ୍ତ ବୈଠକରେ ବିଶଦ ଭାବେ ଆଲୋଚନା କରାଯାଇଛି ।
