ଯୋଜନା ସମ୍ପୂର୍ଣ୍ଣ ଅନଲାଇନ୍ ହେବା ପରେ କୃଷକମାନଙ୍କୁ ଆଉ ବାରମ୍ବାର ତହସିଲ୍ କିମ୍ବା ଜିଲ୍ଲା କାର୍ଯ୍ୟାଳୟକୁ ଦୌଡ଼ିବାକୁ ପଡ଼ିବ ନାହିଁ, ଯାହାଫଳରେ ଦୁର୍ନୀତିର ସମ୍ଭାବନା ହ୍ରାସ ପାଇବ । ଏହି ପୋର୍ଟାଲ୍ ମାଧ୍ୟମରେ ଆବେଦନ ପ୍ରକ୍ରିୟାଠାରୁ ଆରମ୍ଭ କରି ହିତାଧିକାରୀଙ୍କ ବ୍ୟାଙ୍କ ଖାତାକୁ ସିଧାସଳଖ ଅର୍ଥ ହସ୍ତାନ୍ତର ପର୍ଯ୍ୟନ୍ତ ସମସ୍ତ କାର୍ଯ୍ୟ ସୁବିଧାଜନକ ଭାବେ ହେବ ବୋଲି ବିଜ୍ଞପ୍ତିରେ କୁହାଯାଇଛି ।
୨୦୧୯ରୁ ହେଲାଣି ଆରମ୍ଭ :
ଏହା ଭିତରେ ୧ ଲକ୍ଷରୁ ଅଧିକ କୃଷକ ପାଇଲେଣି ସହାୟତା ।
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ କୃଷକ ଦୁର୍ଘଟଣା କଲ୍ୟାଣ ଯୋଜନା ଅଧୀନରେ ବର୍ତ୍ତମାନ ସୁଦ୍ଧା ୧ ଲକ୍ଷ ୮ ହଜାରରୁ ଅଧିକ କୃଷକଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଛି । ଏହି ଯୋଜନାଟି ୨୦୧୯ ମସିହାରୁ କାର୍ଯ୍ୟକାରୀ ହେଉଛି ।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶ କ୍ରମେ ଏହି ଯୋଜନାକୁ ସମ୍ପୂର୍ଣ୍ଣ ରୂପେ ଡିଜିଟାଲାଇଜ୍ କରାଯାଇଛି, ଯାହାଫଳରେ ଯୋଜନାର କାର୍ଯ୍ୟାନ୍ୱୟନରେ ସ୍ୱଚ୍ଛତା ଓ ସହଜତା ବୃଦ୍ଧି ପାଇଛି । ଉତ୍ତର ପ୍ରଦେଶ ସୂଚନା ବିଭାଗ ପକ୍ଷରୁ ଜାରି କରାଯାଇଥିବା ପ୍ରେସ୍ ବିଜ୍ଞପ୍ତି ଅନୁସାରେ, ଏହି ଯୋଜନା କେବଳ ଦୁର୍ଘଟଣା ସମୟରେ କୃଷକଙ୍କ ପରିବାରକୁ ସହାୟତା ଦେଉନାହିଁ, ବରଂ ରାଜ୍ୟର ଗ୍ରାମୀଣ ଅର୍ଥନୀତିକୁ ସ୍ଥିରତା ମଧ୍ୟ ପ୍ରଦାନ କରୁଛି ।
ଏହି ଯୋଜନା ଅଧୀନରେ ଯଦି କୌଣସି କୃଷକଙ୍କ ଦୁର୍ଘଟଣାଜନିତ ମୃତ୍ୟୁ ହୁଏ କିମ୍ବା ସେ ଭିନ୍ନକ୍ଷମ/ଅକ୍ଷମ ହୁଅନ୍ତି, ତେବେ ତାଙ୍କ ପରିବାରକୁ ସର୍ବାଧିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ଯୋଗାଇ ଦିଆଯାଉଛି ।
ପ୍ରେସ୍ ବିଜ୍ଞପ୍ତି ଅନୁସାରେ, ରାଜସ୍ୱ ବିଭାଗ ପକ୍ଷରୁ ୨୦୫-୨୬ ଆର୍ଥିକ ବର୍ଷରେ ୮୭୩.୫୮ କୋଟି ଟଙ୍କା ବଣ୍ଟନ କରାଯାଇଛି । ଏହା ମାଧ୍ୟମରେ ରାଜ୍ୟର ୧୮, ୧୪୫ ଜଣ କୃଷକ ଓ ତାଙ୍କ ପରିବାର ଆର୍ଥିକ ସହାୟତା ପାଇଛନ୍ତି ।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ, ୨୦୨୩-୨୪ ମସିହାରେ ଏହି ଯୋଜନାର ପରିସରକୁ ବିସ୍ତାର କରାଯାଇ ଜମିହୀନ କୃଷକ ଓ ବୃତ୍ତିଗତ ଶ୍ରମିକଙ୍କୁ ମଧ୍ୟ ଏଥିରେ ସାମିଲ କରାଯାଇଥିଲା । ୨୦୨୩-୨୪ ଆର୍ଥିକ ବର୍ଷରେ ଏହି ଯୋଜନା ଅଧୀନରେ ୯୪୪.୭୨ କୋଟି ଟଙ୍କା ବଣ୍ଟନ କରାଯାଇଥିବା ବେଳେ ୧୯,୮୨୧ ଜଣ କୃଷକ ଉପକୃତ ହୋଇଥିଲେ । ୨୦୧୯ ମସିହାରୁ ଯୋଜନା ଆରମ୍ଭ ହେବା ପରଠାରୁ ସମୁଦାୟ ୧,୦୮,୦୯୮ ଜଣ କୃଷକ ଓ ତାଙ୍କ ପରିବାର ଆର୍ଥିକ ସହାୟତା ପାଇଛନ୍ତି, ଯାହା ଏହି ପରିବାରଗୁଡ଼ିକ ପାଇଁ ଏକ ‘ସାମାଜିକ ସୁରକ୍ଷା କବଚ’ ଭାବେ କାମ କରୁଛି ବୋଲି ଉଲ୍ଲେଖ କରାଯାଇଛି ।
ଉତ୍ତର ପ୍ରଦେଶର ରାଜସ୍ୱ ବୋର୍ଡ ଯୋଜନାକୁ ସୁଚାରୁ ଓ ପାରଦର୍ଶୀ ଭାବେ କାର୍ଯ୍ୟାନ୍ୱୟନ କରିବା ପାଇଁ ସମ୍ପୂର୍ଣ୍ଣ ଡିଜିଟାଲିକରଣ କରିଛି । ପ୍ରେସ୍ ରିଲିଜ୍ ରେ ଏହା ମଧ୍ୟ କୁହାଯାଇଛି ଯେ, ଜାତୀୟ ସୂଚନା କେନ୍ଦ୍ର (ଏନ୍ଆଇସି)ର ସହଯୋଗରେ ଏକ ଆଧୁନିକ ୱେବ ପୋର୍ଟାଲ୍ ଓ ସଫ୍ଟୱେର ଉନ୍ନୟନ କରାଯାଉଛି, ଯାହା ଫେବୃଆରୀ ୨୦୨୬ ସୁଦ୍ଧା ସମ୍ପୂର୍ଣ୍ଣ ହେବ ।
ଯୋଜନା ସମ୍ପୂର୍ଣ୍ଣ ଅନଲାଇନ୍ ହେବା ପରେ କୃଷକମାନଙ୍କୁ ଆଉ ବାରମ୍ବାର ତହସିଲ୍ କିମ୍ବା ଜିଲ୍ଲା କାର୍ଯ୍ୟାଳୟକୁ ଦୌଡ଼ିବାକୁ ପଡ଼ିବ ନାହିଁ, ଯାହାଫଳରେ ଦୁର୍ନୀତିର ସମ୍ଭାବନା ହ୍ରାସ ପାଇବ । ଏହି ପୋର୍ଟାଲ୍ ମାଧ୍ୟମରେ ଆବେଦନ ପ୍ରକ୍ରିୟାଠାରୁ ଆରମ୍ଭ କରି ହିତାଧିକାରୀଙ୍କ ବ୍ୟାଙ୍କ ଖାତାକୁ ସିଧାସଳଖ ଅର୍ଥ ହସ୍ତାନ୍ତର ପର୍ଯ୍ୟନ୍ତ ସମସ୍ତ କାର୍ଯ୍ୟ ସୁବିଧାଜନକ ଭାବେ ହେବ ବୋଲି ବିଜ୍ଞପ୍ତିରେ କୁହାଯାଇଛି ।
ପାରଦର୍ଶିତା ଏବଂ ପ୍ରଭାବଶାଳୀ ନିରୀକ୍ଷଣ ପାଇଁ ଏହି ପୋର୍ଟାଲ୍କୁ ଏକ ଡ୍ୟାସ୍ବୋର୍ଡ ସହ ମଧ୍ୟ ସଂଯୋଗ କରାଯାଉଛି । କଠିନ ସମୟରେ ରାଜ୍ୟର କୃଷକମାନଙ୍କୁ ଆର୍ଥିକ ସହାୟତା ଦେଇ, ଏହି ଯୋଜନା ଯୋଗୀ ସରକାରଙ୍କ କୃଷକ-ମୈତ୍ରୀ ଆଭିମୁଖ୍ୟକୁ ଦୃଢ଼ କରୁଛି ବୋଲି ପ୍ରେସ୍ ରିଲିଜ୍ରେ ଉଲ୍ଲେଖ ଅଛି ।
