ଦୁଇଟି ନ୍ୟାୟିକ ହସ୍ତକ୍ଷେପ ଓ ଆଶାବାଦର ଦୁଇଟି ଝଲକ

ଏଠାରେ ଉଲ୍ଲେଖଯୋଗ୍ୟ ଯେ, ଏହି ଦିଗରେ ମାନ୍ୟବର ସର୍ବୋଚ୍ଚ ନ୍ୟାୟାଳୟଙ୍କ ନିକଟରେ ଦୁଇ ନ୍ୟାୟିକ ହସ୍ତକ୍ଷେପ ଏକ ଏକ ଆଶାବାଦର ଝଲକ କହିଲେ ଅତ୍ୟୁକ୍ତି ହେବନାହିଁ । ପ୍ରଥମଟି ନ୍ୟାୟିକ ସେବା ପରୀକ୍ଷାରେ ଦୃଷ୍ଟିବାଧିତ ପ୍ରାର୍ଥୀଙ୍କ ଅଂଶଗ୍ରହଣକୁ ମାନ୍ୟବର ସୁପ୍ରିମକୋର୍ଟର ଏକ ଦୁଇଜଣିଆ ଖଣ୍ଡପୀଠ ଜେ.ବି. ପାର୍ଦିୱାଲା ଏବଂ ଆର୍ ମହାଦେବନ୍ ୨୩.୦୬.୨୦୨୩ରେ ସଂଶୋଧିତ ମଧ୍ୟପ୍ରଦେଶ ନ୍ୟାୟିକ ସେବା ପରୀକ୍ଷା ନିୟମ, ୧୯୯୪ ଏବଂ ରାଜସ୍ଥାନ ନ୍ୟାୟିକ ସେବା ନିୟମ, ୨୦୧୦ର ବୈଧତାକୁ ଚ୍ୟାଲେଞ୍ଜ କରି ଦୃଷ୍ଟିହୀନ ପ୍ରାର୍ଥୀମାନେ ନ୍ୟାୟିକ ସେବା ଅଧୀନ ଚୟନ ପ୍ରକି୍ରୟାରେ ଅଂଶଗ୍ରହଣ କରିବାକୁ ଯୋଗ୍ୟ ଅଟନ୍ତି ବୋଲି ରାୟ ପ୍ରଦାନ କରିଛନ୍ତି । ଯେଉଁଥିରେ ମଧ୍ୟପ୍ରଦେଶ ନ୍ୟାୟିକ ସେବା ପରୀକ୍ଷାର ୨୩.୦୬.୨୦୨୩ରେ ସଂଶୋଧିତ ନିୟମ ୬ଏ, ଯାହା ଦୃଷ୍ଟିହୀନ ଏବଂ ସ୍ୱଳ୍ପ ଦୃଷ୍ଟିର ପ୍ରାର୍ଥୀଙ୍କୁ ନ୍ୟାୟିକ ସେବା ପରୀକ୍ଷାରୁ ବଞ୍ଚିତ କରିଥିଲା । ଅନ୍ୟଟି ରାଜସ୍ଥାନ ନ୍ୟାୟିକ ସେବା ନିୟମ, ୨୦୧୦ ଯେଉଁଥିରେ ବେଞ୍ଚ୍ମାର୍କ ଭିନ୍ନକ୍ଷମ ପ୍ରାର୍ଥୀଙ୍କ ନିମନ୍ତେ ଏକ ପୃଥକ୍ ମେରିଟ୍ ଲିଷ୍ଟ କିମ୍ବା କଟ୍ ଅଫ୍ ଲିଷ୍ଟ ଘୋଷଣାର ବ୍ୟବସ୍ଥା ନ ଥିବା ସଂକ୍ରାନ୍ତୀୟ ଆବେଦନ ରହିଥିଲା । ମାନ୍ୟବର ବେଞ୍ଚ୍ ରିଜନେବୁଲ ଆକମୋଡେ଼ସନ୍ ବା ଯୁକ୍ତିଯୁକ୍ତ / ଯଥାର୍ଥ ଅନୁକୂଳିତ ବ୍ୟବସ୍ଥା ନୀତିର ତର୍ଜମା କରି ପ୍ରକାଶ କରିଥିଲେ ଯେ, ଏହା ଏକ ଅବଧାରଣା ଯାହା କେବଳ ଜଣେ ଭିନ୍ନକ୍ଷମଙ୍କୁ ସମାନ ସୁଯୋଗ ପ୍ରଦାନ କରିବା ସହ ଜଡ଼ିତ ନୁହେଁ, ବରଂ ଏହା ବ୍ୟକ୍ତିର ଉପଯୁକ୍ତତା ଆକଳନ କରିବାର ବାର୍ତ୍ତା ପ୍ରଦାନ ସହ ବ୍ୟକ୍ତିର ମର୍ଯ୍ୟାଦାକୁ ସୁନିଶ୍ଚିତ କରିବା ଦିଗରେ ଅଗ୍ରସର ହୁଏ । ସାମର୍ଥ୍ୟର ଡାକ୍ତରୀ ବା କ୍ଲିନିକାଲ ମୂଲ୍ୟାଙ୍କନ ଦ୍ୱାରା ପରୀକ୍ଷା ଏବଂ ମାପ କରାଯିବା ଉଚିତ୍ ନୁହେଁ ବରଂ ଯଥାର୍ଥ ବା ଯୁକ୍ତିଯୁକ୍ତ ଅନୁକୂଳିତ ବ୍ୟବସ୍ଥା ନୀତି ଓ ଏକ ସକ୍ଷମ ବାତାବରଣ କରାଇବା ପରେ ମୂଲ୍ୟାଙ୍କନ କରାଯିବା ଉଚିତ୍ ।