ଆଣ୍ଟିବାୟୋଟିକ ରେଜିଷ୍ଟାନ୍ସ ଓ ସୁପରବଗ

ଭାରତରେ ଆଣ୍ଟିବାୟୋଟିକ୍ସ ଯେ କୌଣସି ଔଷଧ ଦୋକାନରୁ ବିନା ଦ୍ୱିଧାରେ ଏପରିକି ବିନା ପ୍ରେସ୍କ୍ରିପ୍ସନ୍‌ରେ ଉପଲବ୍ଧ ହୋଇପାରେ । ପ୍ରବାସୀ ଭାରତୀୟମାନେ ସାଧାରଣ ଭାବେ ନିଜ ଦେଶକୁ ବୁଲିଆସି ଫେରିବା ବେଳେ ବିଭିନ୍ନ ଆଣ୍ଟିବାୟୋଟିକ୍ସ ନେଇଯାଆନ୍ତି; କାରଣ ବିଦେଶରେ ବିନା ପ୍ରେସ୍କ୍ରିପ୍ସନ୍‌ରେ ଏପରି ଔଷଧ ମିଳେନାହିଁ କିମ୍ବା ବିଦେଶୀ ଡାକ୍ତର ଭାରତ ଭଳି ସହଜରେ ଆଣ୍ଟିବାୟୋଟିକ୍ସ ଖାଇବାକୁ ଉପଦେଶ ଦିଅନ୍ତି ନାହିଁ । ଆମ ଦେଶରେ ସର୍ଦ୍ଧି, କାଶ ଭଳି ସାମାନ୍ୟ ଦେହ ଖରାପ ହେଲେ ମଧ୍ୟ ଡାକ୍ତର ଏହି ଔଷଧ ଦେବା କିଛି ନୂଆ ନୁହେଁ । ଏପରିକି ସାଧାରଣତଃ ଡାକ୍ତରଙ୍କ ଫିସ୍ ଦେବାରୁ ରକ୍ଷା ପାଇବାକୁ ରୋଗୀମାନେ ଔଷଧ ଦୋକାନୀଙ୍କ ପରାମର୍ଶ ସହିତ ଆଣ୍ଟିବାୟୋଟିକ୍ସର ବହୁଳ ବ୍ୟବହାର କରନ୍ତି । ଗବେଷଣା କହେ, ସମଗ୍ର ବିଶ୍ୱରେ ଘରେ ସର୍ବାଧିକ ପରିମାଣର ଆଣ୍ଟିବାୟୋଟିକ୍ସ ବ୍ୟବହାର ଭାରତରେ ହୋଇଥାଏ । ଭାରତୀୟମାନେ ଆଣ୍ଟିବାୟୋଟିକ୍ସର ସମ୍ପୂର୍ଣ୍ଣ କୋର୍ସ ନ ଖାଇ ପଇସା ବଞ୍ଚେଇବା ଉଦ୍ଧେଶ୍ୟରେ ରୋଗ ଟିକେ ଉପଶମ ହେବା ମାତ୍ରେ ଦୁଇ ଚାରିଟି ବଟିକା ଖାଇ ମନଇଚ୍ଛା ବନ୍ଦ କରି ଦେଉଥିବା ଦେଖାଯାଏ । ମିଳିଥିବା ତଥ୍ୟ ଅନୁସାରେ ଭାରତରେ ବ୍ୟାକ୍ଟେରିଆ ସଂକ୍ରମଣ ରିପୋର୍ଟ ରୋଗୀ ପାଖରେ ନ ଥିଲେ ମଧ୍ୟ ଆଣ୍ଟିବାୟୋଟିକ୍ସ ଡାକ୍ତର ବିଭିନ୍ନ କାରଣରୁ ସେବନ କରିବାକୁ ପରାମର୍ଶ ଦିଅନ୍ତି । ବହୁଳ ବ୍ୟବହାର କିମ୍ବା ଅସମ୍ପୂର୍ଣ୍ଣ କୋର୍ସ ଖାଇବା ଦ୍ୱାରା ସଂକ୍ରମଣ କରୁଥିବା ବ୍ୟାକ୍ଟେରିଆର ସେହି ଆଣ୍ଟିବାୟୋଟିକ୍ସ ପ୍ରତି ପ୍ରତିରୋଧ (ରେଜିଷ୍ଟାନ୍ସ) କ୍ଷମତା ବଢ଼ିଥାଏ କିମ୍ବା ସେ ନିଜକୁ ଏହି ଔଷଧରୁ ଭବିଷ୍ୟତରେ ରକ୍ଷା କରିବା ଉଦ୍ଧେଶ୍ୟରେ ଜିନ୍ ସ୍ତରରେ ପରିବର୍ତ୍ତନ କରି ମ୍ୟୁଟେସନ କରିଥାଏ । ଏପରି ହେବା ଦ୍ୱାରା ରୋଗୀମାନଙ୍କ ପାଇଁ ଆଣ୍ଟିବାୟୋଟିକ ରେଜିଷ୍ଟାନ୍ସ ଭଳି ସମସ୍ୟା ବୃଦ୍ଧିପାଇ ଏବେ ଡାକ୍ତରମାନଙ୍କ ମୁଣ୍ଡବିନ୍ଧାର କାରଣ ହେଉଛି । ରେଜିଷ୍ଟାଣ୍ଟ ବ୍ୟାକ୍ଟେରିଆମାନଙ୍କ ଦ୍ୱାରା ଆକ୍ରାନ୍ତ ରୋଗୀଙ୍କୁ ଚିକିତ୍ସା କରିବା ସହଜ ହୋଇ ନ ଥାଏ; କାରଣ ସେମାନେ ପୂର୍ବ ଆଣ୍ଟିବାୟୋଟିକ୍ସ କିମ୍ବା ଅନ୍ୟ ଆଣ୍ଟିବାୟୋଟିକ୍ସ ଦ୍ୱାରା ପ୍ରଭାବିତ ନ ହୋଇ ରୋଗ ସମସ୍ୟା ବଢ଼ାଇ ରୋଗୀକୁ ମୃତ୍ୟୁମୁଖୀ କରିଥାନ୍ତି । ଏପରି କି ରୋଗୀମାନଙ୍କ ପାଇଁ ଚିକିତ୍ସା ଖର୍ଚ୍ଚ ମଧ୍ୟ ଅତ୍ୟଧିକ ବୃଦ୍ଧି ଘଟେ । ମାତ୍ରାଧିକ ଆଣ୍ଟିବାୟୋଟିକ୍ସ ବ୍ୟବହାର ଶରୀର ମଧ୍ୟରେ ଅନେକ ପାଶ୍ୱର୍ପ୍ରତିକ୍ରିୟା ସହିତ ମେଟାବୋଲିକ ଓ ନିଓପ୍ଲାଷ୍ଟିକ ବ୍ୟତିକ୍ରମରେ କାରଣ ହୋଇ କ୍ୟାନ୍ସର ଭଳି ମାରାତ୍ମକ ରୋଗର କାରକ ହେଉଥିବା ଦେଖାଯାଉଛି । ଏତଦ୍ ବ୍ୟତୀତ, ରେଜିଷ୍ଟାଣ୍ଟ ବ୍ୟାକ୍ଟେରିଆଗୁଡ଼ିକ ଅନ୍ୟ ରୋଗୀମାନଙ୍କୁ ସଂକ୍ରମିତ କରି ଜୀବନ ମୃତ୍ୟୁମୁଖୀ କରାଇପାରେ । ଏହି ରେଜିଷ୍ଟାଣ୍ଟ ବ୍ୟାକ୍ଟେରିଆଗୁଡ଼ିକ ନିଜର ମାରତ୍ମକତା ଯୋଗୁଁ “ସୁପରବଗ’ ଆଖ୍ୟା ଦିଆଯାଇଛି ।